కాశీ కేదారం

గంగా పుషకరాలు - ఆఖరు రోజు అపశృతి?

2011-05-19T09:14:00.000-07:00

గంగా పుష్కరాలకు ఆంధ్ర ప్రదేశ్ నుండి వచ్చిన యాత్రికుల బృందం అయోధ్యనుండి అలహాబాదు నుండి వెళుతుండగా ట్యాంకర్ తో ఢీ కొని కొందరు యాత్రీకులు మృతి చెందినట్లు, ఇద్దరు తీవ్రంగా గాయపడినట్లు సమాచారం ఇప్పుడే అందింది.

ఈ యాత్రికులు వారణాశినుండి అయోధ్య ను దర్శించి అక్కడనుండి అలహాబాదు వెళుతుండగా అయోధ్యనుండి 25 కి. మీ. దూరంలో టాంకర్ తో ఢీకొందని సమాచారం.

యాత్రికులు నెల్లూరుకు చెందిన రెడ్డి కుటుంబమునకు చెందిన వారుగా గుర్తించారు. ఇందులో కొందరు శ్రీ రామతారక ఆంధ్రా ఆశ్రమములోను కొందరు చుట్టుప్రక్కల ఇతర ఆశ్రమములలోను బస చేసారని తెలిసింది. మృతి చెందిన వారిలో ఒకరి పేరు కరిష్మా రెడ్డి అని తెలిసింది.

యాత్రీకులలో ఇద్దరు పురుషులు, పది మంది మహిళలు ఉన్నారని తెలిసింది.

గంగా పుష్కరములు - వార్తలు విశేషాలు

2011-05-13T23:16:00.000-07:00

గంగా పుష్కరాలు జోరుగా సాగుతున్నాయి. యాత్రీకుల సందడి ఎక్కు అయ్యిందే కాని తగ్గలేదు.

నిన్న శ్రీమతి వెంకట సుబ్బమ్మ గారు అనే చీరాలనుండి వచ్చిన 80 సంవత్సరాల వృద్ధురాలు స్వర్గస్థులయిన సంగతి తెలిసింది. ఆమెతో వచ్చిన వారు వారి బంధువులతో మాట్లాడి వారణాసిలోనే అంత్యక్రియలు జరిపినట్లు సమాచారం.

ఆశ్రమాలు అన్నీ యాత్రికులతో కిటకిట లాడుతున్నాయి.

రామతారక ఆంధ్రాశ్రమంలోనే రోజూ 600 వరకూ యాత్రీకులు భోజన ఫలహార సదుపాయాన్ని ఉపయోగించుకుంటున్నారు.

ఆంధ్రా ఆశ్రమంలో సాయింత్రం 6.00 గం. నుండి రాత్రి 9.30 గం .వరకూ యాత్రికులకు ఉచిత వైద్య శిబిరం నడుపుతున్నారు. దీనిని డా. ఆర్. సి. కౌడి మరియు డా. నరసింహ మూర్తిగారు లు నిర్వహిస్తున్నారు. ప్రతిరోజు దాదాపుగా 25 - 30 మంది యాత్రికులు ఈ సదుపాయాన్ని ఉపయోగించు కుంటున్నారు.

12 వ తారీఖు సాయింత్రం ఆంధ్రాశ్రమంలో జరిగిన కార్యక్రమంలో శ్రీశ్రీశ్రీ సిద్ధేశ్వర భారతి స్వాములు వారు, పీఠాధిపతులు, శ్రీ సిద్ధేశ్వర పీఠం, కుర్తాళం వారు ఇంతకు ముందు ఈ బ్లాగులో ప్రకటించిన ఆర్షధర్మము పుస్తకాన్ని ఆవిష్కరించారు. కార్యక్రమములో శ్రీ ముక్తేవి సీతారామయ్యగారు, శ్రీ జానపాటి బాల నరస అప్పేశ్వర శాస్త్రిగారు, శ్రీ సుందర శాస్త్రిగారు పాల్గొన్నారు. కార్యక్రమాన్ని శ్రీ సోమవఝల నాగేంద్ర ప్రసాద్ నిర్వహించగా, శ్రీ అప్పేశ్వర శాస్త్రిగారు పుస్తకమును రాయడంలోని ఉద్దేశాన్ని తెలియచేశారు. శ్రీ శ్రీ శ్రీ స్వామివారు తమ అనుగ్రహ భాషణమును ఇచ్చి - శుక్లాంబరధరం ... శ్లోకమునకు సరయిన అర్థాన్ని, అలాగే పుస్తకంలో ఉన్న మొదటి శ్లోకం కరాగ్రే వసతే .... కు సరయిన వివరణలనిచ్చారు.

గంగా పుష్కరాలు - ప్రారంభం

2011-05-09T00:41:00.000-07:00

మే 8, 2011 ఆదివారం నాడు వారణాశిలో గంగాపుష్కరాలు ప్రారంభం అయ్యాయి. ఆంధ్రా ఆశ్రమం చుట్టు ప్రక్కల ప్రాంతాలంతా ఆంధ్ర ప్రదేశ్ నుండి వచ్చిన తీర్థ యాత్రికులతో కిటకిట లాడుతున్నాయి. చాలా మంది యాత్రికులు గంగ ఒడ్డునే నిద్రించి ఉదయం 3.30 ని. నుండే స్నానాలు చెయ్యడం మొదలు పెట్టారు. దాదాపు లక్షమంది స్నానాలు చేసారని అంచనా. స్నానాలు చేయడం, పితృ దేవతలకు తర్పణాలు వదలడం దాదాపు సాయింత్రం వరకూ కొనసాగుతూనే ఉంది. వివిధ పంచాంగాలలో గురుని మేషప్రవేశం వివిధ సమయాలలో చూపించడం వల్ల యాత్రికులలో కొంత తికమక కొనసాగింది.

ఈ గంగా పుష్కరాల ఆచారం ఆంధ్రావారికి మాత్రమే ఉండడంతో గంగ ఘాట్లు అన్నీ ఆంధ్రనుండి వచ్చిన యాత్రికులతో కళకళ లాడుతున్నాయి. ఆంధ్రా ఆశ్రమంలో గదులు తక్కువ ఉండటంతో మానేజిమెంటువారు దాతలకు మాత్రమే 3 రోజులకు మాత్రమే గదులు ఇవ్వాలని నిర్ణయించడంతో డోనర్లు కాని యాత్రీకులకు గదులు దొరకుటలేదు. దాదాపు 3 నెలలనుండే ఆంధ్రాశ్రమం చుట్టుపక్కల ఉన్న చాలా సత్రములను, ఇళ్లను యాత్రీకులు రిజర్వ్ చేసుకున్నారు.

అఖిల భారత కరివెన నిత్యాన్నదాన సత్రం వారు పుష్కరముల సందర్బంగా యాత్రీకుల ఒత్తిడిని దృష్టిలో ఉంచుకుని ప్రత్యేక ఏర్పాట్లను చేసారు. వారి సత్రానికి ఎదురుగా కల మందిరంలో ఉన్న ఖాళీ స్థలంలో పందిర్లు వేయించి బ్రాహ్మణ యాత్రీకులకు భోజన వసతి కలిపిస్తున్నారు. వీరు కాక బాసరనుండి వచ్చిన వారుకూడా కుమారస్వామి మఠములో బ్రాహ్మణులకు భోజన వసతి కలిపిస్తున్నారు.

ఆంధ్రాశ్రమము, వైశ్య సత్రములలో ఆశ్రమములో నివసిస్తున్నవారికి మాత్రమే మధ్యాహ్న భోజనం, సాయింత్రం ఉపాహారం సదుపాయం కలిపిస్తున్నారు.

కాశీ విశ్వనాధ మందిరంలో దర్శనానికి 5 గంటలు పట్టిందని సమాచారం.

ఇంతవరకూ ఏవిధమయిన అపశృతులు చోటుచేసుకోలేదు. యాత్రీకుల సౌకర్యార్థం కాశీ తెలుగు సమితి తయారు చేసిన కరపత్రాన్ని ముద్రించి యాత్రికులకు పంచుతున్నారు.

గంగా పుష్కరములు - జాగ్రత్తలు

2011-05-07T00:44:00.000-07:00

శ్రీ కాశీ తెలుగు సమితి

వారణాశి

గంగా పుష్కరములు – 2011

యాత్రీకులకు సూచనలు

1) గంగ ఒడ్డున, స్నానము చేసేటప్పుడు మీ సామానులు జాగ్రత్త. మిమ్ములను ఏమర్చి మీ సామానులతో పరారవ్వగలరు.

2) గంగమెట్లు చాలా జారుతూ ఉంటాయి కనుక జాగ్రత్త.

3) విశ్వనాథ మందిరము, సంకట మోచన్ మొదలగు మందిరములకు వెళ్ళునపుడు కెమేరాలు, సెల్ ఫోనులు, పెన్నులు, ఆడవారి పర్సులు తీసుకొని వెళ్లరాదు.

4) బంగారు ఆభరణములు ధరించి నగరములో సంచరించవద్దు, ప్రాణాపాయము కూడా కలుగు వచ్చు.

అత్యవసర పరిస్థితులలో ఈ క్రింది నెంబర్లకు ఫోన్ చెయ్యగలరుః

శ్రీ రామతారక ఆంధ్రా ఆశ్రమము – 0542-2450418
శ్రీ కరివెన సత్రము – 0542-2451953
శ్రీ గుంటూరు వైశ్య సత్రం – 0542-2451534
శ్రీ క్షత్రియ ఆశ్రమము – 0542-2277477
పోలీసు కంట్రోల్ రూమ్ – 100 మరియు 0542-2414141

గంగా పుష్కరములు - ४ భాగము - చేయవలసిన విధులు

2011-05-05T02:02:00.000-07:00

పుష్కరములలో చేయవలసిన కార్యక్రమములు

పుష్కర నదీ స్నానం

కాశీలో స్నానం చేయునపుడు చెప్పుకొనవలసిన సంకల్పం

... ... ... ... శుభే శోభనే మహూర్తే శ్రీ మహావిష్ణో రాజ్ఞయా ప్రవర్త మానస్య ఆద్య బ్రహ్మణః ద్వితీయపరార్థే శ్వేత వరాహకల్పే వైవస్వత మన్వంతరే, అష్టా వింశతితమే కలియుగే, ప్రథమ పాదే, విక్రమ శకే, బౌద్ధావతారే, జమ్బూద్వీపే, భరతవర్షే, భరత ఖండే, మేరోః దక్షిణ దిగ్భాగే, వింధ్యస్యోత్తర ఆర్యావర్తైకదేశే, అసీ వరణయో ర్మధ్యే, అవిముక్త వారాణసీ క్షేత్రే, ఆనందవనే, మహాశ్మశానే, గొరీ ముఖే, త్రికంటక విరాజతే , ఉత్తర వాహిన్యాః భాగీరథ్యాః పశ్చిమేతీరే, బ్రహ్మనాళే, మహామణికర్ణికా క్షేత్రే, శ్రీ విశ్వేశ్వరాది త్రయస్త్రిం శత్కోటి దేవతా గోబ్రాహ్మణ హరిహర గురుచరణ సన్నిధౌ, అస్మిన్ వర్తమాన వ్యావహారిక బార్హస్వత్య మానేన క్రోధి నామ సంవత్సరే, చాంద్ర సౌరమానాభ్యాం ఖర నామ సంవత్సరే ఉత్తరాయణే , వసంత ఋతౌ, వైశాఖ మాసే, ... ... ... పక్షే, ... ... ... శుభ తిథౌ ... ... ... వాసరే, శుభ నక్షత్రే, శుభ యోగే, శుభ కరణే ఏవం గుణ విశేషణ విశిష్టాయాం శుభ తిథౌ శ్రీమాన్/ శ్రీమతీ … … --- --- --- గోత్రః / గోత్రా … … … --- --- --- నామ ధేయః / నామధేయా శ్రీ మతః/శ్రీమత్యాః --- --- --- గోత్రస్య / గోత్రాయాః … --- --- --- నామ ధేయస్య / నామ ధేయాయాః ధర్మపత్నీ సమేతస్య / సభర్తృకాయాః సహకుటుంబస్య / సహ కుటుంబాయాః మమ క్షేమ స్థైర్య ధైర్య విజయ ఆభయ ఆయురారోగ్య ఐశ్వర్యాభి వృద్ధ్యర్ధం ధర్మార్ధ కామ మోక్ష చతుర్విధ ఫల పురుషార్థ సిద్ధ్యర్థం ఇహజన్మని జన్మ జన్మాంతరేషు మనోవాక్కాయ కర్మభిః జ్ఞానాజ్ఞానకృత సర్వ పాపక్షయార్థం శ్రీ విశాలాక్షీ అన్నపూర్ణా సమేత శ్రీ కాశీ విశ్వేశ్వర దేవతా ప్రీత్యర్థం మహామణికర్ణికా / భాగీరథీ స్నాన మహం కరిష్యే.

పుష్కర సమయంలో నదీస్నానమే కాక పితృదేవతలకు పిండ ప్రదానం చేయడం కూడా ముఖ్యం. అందువల్ల ఈ దిగువ తెలిపిన మీ పూర్వీకుల వివరములు (పేరు, గోత్రం మొదలయినవి) తప్పక తెలుసుకుని తెచ్చుకోండి.

పితరం (తండ్రి) గోత్రం శర్మాణం* వసురూపం
పితామహం (తాత) గోత్రం శర్మాణం రుద్రరూపం
ప్రపితామహం (ముత్తాత) గోత్రం శర్మాణం ఆదిత్యరూపం
మాతరం (తల్లి) గోత్రం దాయీం వసురూపం
పితామహీం (మామ్మ) గోత్రం దాయీం రుద్రరూపం
ప్రపితామహీం (ముత్తమ్మ) గోత్రం దాయీం ఆదిత్యరూపం
సపత్నీమాతరం (సవతితల్లి) గోత్రం దాయీం వసురూపం
మాతామహం (తల్లి తండ్రి) గోత్రం శర్మాణం వసురూపం
మాతుః పితామహం (తల్లి తాత) గోత్రం శర్మాణం రుద్రరూపం
మాతుః ప్రపితామహం (తల్లి ముత్తాత)గోత్రం శర్మాణం ఆదిత్యరూపం
మాతామహీం (అమ్మమ్మ) గోత్రం దాయీం వసురూపం
మాతుః పితామహీం (తల్లి మామ్మ) గోత్రం దాయీం రుద్రరూపం
మాతుః ప్రపితామహీం (తల్లి ముత్తమ్మ) గోత్రం దాయీం ఆదిత్యరూపం
ఆత్మ పత్నీం (భార్య) గోత్రం దాయీం వసురూపం
సుతం (కుమారుడు) గోత్రం శర్మాణం రుద్రరూపం
భ్రాతరం (సోదరుడు) గోత్రం శర్మాణం ఆదిత్యరూపం
పితృవ్యం (తండ్రి సోదరుడు) గోత్రం శర్మాణం వసురూపం
మాతులం (తల్లి సోదరుడు) గోత్రం శర్మాణం రుద్రరూపం

మాతులస్య పత్నిం (మేమమామ భార్య) గోత్రం దాయీం రుద్ర రూపం
దుహితరం (కూతురు) గోత్రం దాయీం వసురూపం
ఆత్మభగినీం (సోదరి) గోత్రం దాయీం వసురూపం
దౌహిత్రం (కూతురి కొడుకు) గోత్రం దాయీం వసురూపం
భాగినేయకం (మేనల్లుడు) గోత్రం శర్మాణం
పితృభగినీం (తండ్రి సోదరి) గోత్రం దాయీం వసురూపం

పితృభగినీ భర్తారం (మేనత్త భర్త) గోత్రం శర్మాణం వసురూపం
పితృభగినీ సుతం (మేనత్తల కుమారులు) గోత్రం శర్మాణం వసురూపం

మాతృభగినీం (తల్లి సోదరి) గోత్రం దాయీం వసురూపం
మాతృభగినీం భర్తారం (పైవారి భర్తలు) గోత్రం శర్మాణం వసురూపం

మతృభగినీ సుతం (పైవారి కుమారులు) గోత్రం శర్మాణం వసురూపం

జామాతరం (అల్లుడు) గోత్రం శర్మాణం వసురూపం
భావుకం (బావ, బావమరిది) గోత్రం శర్మాణం వసురూపం
స్నుషాం (కోడలు) గోత్రం దాయీం వసురూపం
స్వశురం (భార్య తండ్రి) గోత్రం శర్మాణం వసురూపం
స్వశ్రూం (అత్తగారు) గోత్రం దాయీం వసురూపం
శ్యాలకం (భార్య అన్న, తమ్ముడు) గోత్రం శర్మాణం వసురూపం

శ్యాలకస్య పత్నిం (పైవారి భార్యలు) గోత్రం దాయీం వసురూపం

స్వామిన్ (మత గురువు, పీఠాధిపతి)

గురుం (మంత్రోపదేశము, ఉపనయనము చేసినవారు) గోత్రం శర్మాణం వసురూపం

రిక్థినం (ఆస్తి నొసగినవారు, సహాయము చేసినవారు)

పితృవంశములో మృతులు

మాతృవంశములో మృతులు

బంధువర్గములో మృతులు

తనకులమందు శైశవమున, గర్భమున గతించినవారు

అగ్ని, పిడుగు, ఉరుము, మెఱుపుల వలన మృతులు

మృగములవలన హతులు

ఉరి, విషము, ఆయుధములు, ఆత్మహత్యలచే మృతులు

భూతప్రేత, పిశాచులు

రౌరవ, అంధతామిశ్ర, కాలసూత్ర నరకములలోనివారు

అసిపత్ర, కుంభీపాకములలోనివారు

ప్రేతలోకములోని వారు

యమపురములోన వారు

ఇతర నరకములలోని వారు

పశు, పక్షి, కీట, కర్ప, వృక్ష జన్మములలోనివారు

దహన సంస్కారములు జరుగక అంతరిక్ష, పాతాళములందలి వారు

జన్మాంతర బంధువర్గము

దుర్మరణము, బ్రహ్మహత్యాది పాతకులు

బంధువర్గమున సంతతి లేనివారు

దాస, భృత్య, సేవక, ఆశ్రితులు

జన్మాంతర మిత్ర, కళత్ర సుఖమునిచ్చిన ఇతరులు

జన్మాంతరమున పోషింపబడిన స్పృశింప బడినవారు

* క్షత్రియులు వర్మ అనియు, వైశ్యులు గుప్తా అనియు చెప్పుకొన వలెను.

పుష్కరములలో 12 రోజులు చేయవలసిన దానములు ,కార్యక్రమములు

మొదటి రోజు - హిరణ్య శ్రాద్ధ, అన్న శ్రాద్ధ, ధాన్య, భూ, రజిత దానములు

రెండవ రోజు - గో, మణి, లవణ, వస్త్ర దానములు

మూడవ రోజు - గో, గుడ, ఫల, శాక దానములు

నాల్గవ రోజు - తైల, క్షీర, ఘృత దానములు

అయిదవ రోజు - ధాన్య, నాగలి, వృషభ, మహిష దానములు

ఆరవ రోజు - ఘనసార, కస్తూరి, చందన, ఔషధ దానములు

ఏడవ రోజు - గృహ, శయ్య, పీఠ, ఆందోళికా దానములు

ఎనిమిదవ రోజు - పుష్ప, చందన, కందమూల దానములు

తొమ్మిదవ రోజు - పితృశ్రాద్ధ, పిండదాన, కన్యాదానములు

పదవ రోజు - పుష్ప, మక్తాహార, రజత దానములు

పదకొండవ రోజు - యజ్ఞోపవీత, పుస్తక, తాంబూల దానములు

పన్నెండవ రోజు - షోడశ, దశ దానములు

కాశీలో చూడవలసిన ప్రదేశములు

శ్రీ కాశీ విశ్వేశ్వర మందిరం, శ్రీ అన్నపూర్ణ మందిరం, శ్రీ విశాలాక్షి మందిరం, శ్రీ సాక్షి గణపతి, శ్రీ డుంఢి గణపతి, శ్రీ కాలభైరవుడు, శ్రీ దండపాణి, శ్రీ కాశీ మాత (కాశీ గ్రామ దేవత), ఓంకారేశ్వరుడు, శ్రీ సంకట మోచన్ హనుమాన్ మందిరం, శ్రీ తులసీ మానస మందిరం, కాశీ హిందూ విశ్వవిద్యాలం లోని శ్రీ విశ్వనాథ మందిరం (దీనినే బిర్లా మందిరం అని కూడా అంటారు), శ్రీ దుర్గా దేవి (దుర్గా కుండ్), శ్రీ కౌడీ భాయి (దుర్గా కుండ్ వద్ద ఉన్నది), శ్రీ లలితా దేవి, శ్రీ వారాహీ దేవి (లలితా ఘాటులో), బిందు మాధవ మందిరం మరియు తెలంగ స్వామి మఠం (పంచ గంగా ఘాటు), సారనాథ్ లో సారంగనాథ మందిరం మరియు బౌద్ధ మందిరములు (ఇక్కడి పురాతత్వ ప్రదర్శన శాలలో భారత ప్రభుత్వ చిహ్నమయిన మూడు సింహముల స్థంభము ఉన్నది) .

రామనగర్ (దీనినే వ్యాస కాశీ అంటారు) కోట మరియు కోటలో నుండి గంగ ఒడ్డున ఉన్న వ్యాస మరియు శుక స్థాపిత శివలింగములు.

విషయ సేకరణ

జానపాటి బాల నరస అప్పేశ్వర శాస్త్రి, కాశీ వాసి

మారేపల్లి గోపాల కృష్ణ శాస్త్రి, ఉభయ భాషా ప్రవీణ, కాకినాడ

దువ్వూరి వేణు గోపాల్, కా.హి.వి.వి., వారణాసి

ఈ విషయములన్నిటిని ఒక చిన్న పుస్తకముగా వేసి స్క్రిబ్డ్ లో ఉంచినాము దాని లింకు క్రింది ఈయబడినది

pushkar2

గంగా పుష్కరములు - 3వ భాగము - పుష్కర మహాత్మ్యము

2011-05-04T23:41:00.000-07:00

పుష్కర మహాత్మ్యము

నైమిశారణ్యమున శౌనకాది మహర్షులు సత్రయాగము నిర్వహించు సమయమున సూతమహర్షి విచ్చేయగా వారిని ప్రార్థించి శౌనకాదులు మహాత్మా! పాపపంకిలమందు కూరుకొనిపోవుచున్న మానవ జాతికి సత్వర విమోచనమొసంగు సూక్ష్మఉపాయము శలవిండని కోరిరి.

సూతుడు వారి ప్రార్థనను గ్రహించి పుష్కరోత్పత్తి వృత్తాంతమును వారికి వివరించి సాధారణ మానవునికి అత్యంత సూక్ష్మములో పాపపరిహారోపాయమును తెల్పిరి.

పుష్కరుడను బ్రాహ్మణుడు సగటు మానవులందరును పుణ్యనదులలో స్నానమాడి వారి పాపములను నదులకు సంక్రమింపజేయగా నదులు ఎట్లు ఆ పాపములనుండి పునీతులగునను సందిగ్ద తర్కమానసుడై శివుని గురించి తపమాచరించి, ఈశ్వరుని అష్టమూర్తులలో ఒకటగు జలతత్వ సిద్ధికై ప్రాధేయపడగా, భక్తుని ముగ్థావేదనకు సంతసించిన పశుపతి అతనికి ఆభయమొసంగి అతనికి పుష్కర స్ఫూర్తి నొసంగెను. అది తెలిసికొనిన బ్రహ్మ శివుని ప్రార్థించి ఆ పుష్కర స్ఫూర్తిని తన కమండలమందు భద్రపరచుకొనిరి.

ఇంద్రునికి గౌతముని వలన కలిగిన శాపమునుండి విముక్తి కొరకు అతడు బృహస్పతిని ఆశ్రయించగా, దేవగురువగు బృహస్పతి ఇంద్రుని బ్రహ్మవద్దకు తోడ్కొనివెళ్ళి శాపవిమోచనమనుగ్రహింప వేడిరి. అంత బ్రహ్మ మందాకిని వద్ద ఒక సరస్సుని నిర్మించి అందు తన కమండలమందలి పుష్కర స్ఫూర్తిని ఒక బిందువు ప్రోక్షింపగా మహేంద్రుడు ఆ సరస్సులో స్నానమాడి తన వికృతరూపమునుండి విముక్తి పొంది యధాపూర్వ సుందర రూపమును బొందెను.

ఆకాశ గంగ కన్నను అత్యంత ప్రభావసమన్వితమయిన పుష్కర మహాత్మ్యమునకు అబ్బురపడిన బృహస్పతి, దేవేంద్రులు మహోత్సాహమున వారి లోకములు చేరిరి. ఈ విషయమును తెలిసికొనిన పుణ్య నదులన్నియూ ఆకాశ గంగకన్నను అమలమయిన ఆపుష్కర సమ్మేళనముకై ఉవ్విళ్లూరి గంగ, గొతమిలు ముందుండగా సర్వ నదులును బ్రహ్మను ప్రార్ధించినవి. పుష్కర మహాత్మ్యమువలన ఇంద్రుని శాపవిమోచనము కనులార గాంచిన బృహస్పతి పుష్కర తత్వమును తనకు కూడ ఆపాదించమని బ్రహ్మను వేడగా పుష్కరుడు అందుకు విముఖుడాయెను. కాని బృహస్పతియు, నదులును అత్యంత దీనముగ ప్రార్థించినందున బ్రహ్మ పుష్కరుని పలురీతుల సంతుష్టుని జేసి, జీవనదుల వాంఛను తీర్చెను.

మేషాది మీన పర్యంతముగల 12 రాసులలో వరుసగా ఒక్కోక్క సంవత్సరము గంగ, నర్మద, సరస్వతి, యమున, గోదావరి, కృష్ణ, కావేరి, భీమ, పుష్కర సరస్సు, తుంగభద్ర, సింధు, ప్రణీత నదులలో బృహస్పతి ఆయా రాసులలో ప్రవేశించునపుడు పుష్కరుడు ఆయా నదులలో మూడుకోట్ల యాబది లక్షల తీర్థముల సమేతుడై తొలి పండ్రెండు దినములును, గురువు ఆ రాశిని వదలు తుది పడ్రెండు రోజులును ఆశ్రయించి యుండునట్లు అంగీకరించినాడు. కాని గోదావరికి మాత్రమే అంత్య పుష్కరమహాత్మ్యము ప్రాముఖ్యమయినది. పుష్కర సమయమున చేసిన తప, హోమ, దాన, ధర్మములు, తర్పణ, పిండ ప్రదానాది కర్మ తంత్రములు సహస్రాధిక ఫల హేతువులు అగునని బ్రహ్మ ఆదేశము, అనుగ్రహము.

మేషరాశి యందు బృహస్పతి ప్రవేశింపగా హరిద్వార్, ప్రయాగ, వారాణసి యందలి గంగానదికిని,

వృషభ రాశియందు అమర కంటక్, ఓంకార క్షేత్రములందు నర్మదానదికిని,

మీధునమందు బదరీ తీర్థమందలి భీమపురి, ప్రయాగ, ప్రభాస తీర్థములందు సరస్వతికిని,

కర్కాటకమందు యమునోత్రి, మధుర, ప్రయాగ యందలి యమునకును,

సింహరాశియందు నాశిక్, కందుకుర్తి, రాజమండ్రి యందలి గోదావరికిని,

కన్యయందు శ్రీశైల, విజయవాడలయందలి కృష్ణా నదికిని,

తులయందు తలకావేరి, శ్రీరంగ పట్టణములయందలి కావేరికిని,

వృశ్చికమందు భీమశంకర్, పండరీపురములందలి భీమానదికిని,

ధనస్సునందు రాజస్థాన్ లో అజ్మీర్ వద్దగల పుష్కర సరస్సునందును,

మకరమందు హంపి, మంత్రాలయమందలి తుంగభద్ర కును,

కుంభమందు పాకిస్థాన్ సరిహద్దులలోని లేహ్ (జమ్ము కాశ్మీర్) వద్ద సింధు నందును,

మీనమందు కాళేశ్వరంలోగల ప్రణీతా నదియందును బృహస్పతి, పుష్కరుడు, మూడుకోట్ల యాబది లక్షల నదులతో ప్రవేశించి పండ్రెండు దినములు అందు స్నానమాడిన వారి పాపములు పటాపంచలు జేయుదురు.

పుష్కర మహాత్మ్యం సమాప్తం

గంగా పుష్కరములు - రెండవ భాగం

2011-05-03T22:50:00.000-07:00

కాశీలోని పురోహితుల వివరములు

చల్లా విజయ కుమార్, (లేటు చల్లా లక్ష్మణ శాస్త్రి గారి పుత్రులు) హరిశ్చంద్ర ఘాట్ రోడ్	2275107
తులసి లక్ష్మీకాంత్ జోషి మరియు తులసి రమాకాంత్ జోషి (లేటు తులసి శీతారాం జోషి గారి పుత్రులు), నారద ఘాటు	2455626 3455288 2450643
రాజవరపు విశ్వనాథ శాస్త్రి, క్షేమేశ్వర ఘాట్	2454218
రామ్ కుమార్జీ అండ్ సన్స్, లలితా ఘాట్	2401411

వారాణాశి వచ్చు రైళ్ళ వివరములు

అటు (ఆంధ్ర)నుండి

ఇటు నుండి

గంగా కావేరి ఎక్సుప్రెస్

విజయవాడనుండి

శని, సోమ

రాత్రి 12.20 గం.

సోమ, బుధ

రాత్రి 1.10 గం.

ఎర్నాకులం ఎక్సుప్రెస్

విజయవాడనుండి

ఆది

రాత్రి 10.00

మంగ

ఉదయం 5.30

రామేశ్వరం - వారణాశి (విజయవాడ

బుధ రా 8.20

ఆది రా. 9.30

సికింద్రాబాద్ పాట్నా

సికింద్రాబాద్ నుండి

ప్రతి రోజు

ప. 10.00

ప్రతి రోజు

రా. 11.30

బెంగళూరు - పాట్నా

విజయవాడనుండి ముఘల్ సరాయ్

ప్రతిరోజు

రా. 10.30 ని.

ప్రతిరోజు

రా. 11.30 ని

పూరి - ఢిల్లీ (నీలాంచల్)

భువనేశ్వరం నుండి వారణాశి

మం, శు, ఆ

మ. 12.25 ని

మం, శు, ఆ

రా. 9.00 గం.

పూరి - ఢిల్లీ

భువనేశ్వరం నుండి ముఘల్ సరాయ్

సో, బు, గు, శ

మ. 12.25 ని.

సో, బు, గు, శ

సా. 6.00 గం.

పూరి - ఢిల్లీ (పురుషోత్తమ్ ఎక్సు.)

భువనేశ్వరం నుండి ముఘల్ సరాయ్

ప్రతి రోజు

రా. 11.25

ప్రతి రోజు

ఉ. 10.20

విమాన సౌకర్యం

వారణాశి ఎయర్ పోర్టు వారణాశి నుండి 30 కి.మీ. దూరంలో బాబత్ పూర్ వద్ద ఉన్నది.

వారణాశికి ముంబైనుండి (ఇండియన్ ఎయర్ లైన్సు, కింగ్ ఫిషర్), ఢిల్లీ నుండి (ఇండియన్ ఎయర్ లైన్సు, కింగ్ ఫిషర్, జెట్ ఎయర్ వేస్ మరియు … … స్పైస్ జెట్), హైదరాబాదు నుండి (స్పైస్ జెట్) మరియు కోల్ కత్తా (జెట్ ఎయర్ వేస్ - వారమునకు 3 రోజులు) నుండి విమానములు ఉన్నవి.

ముఖ్యమయిన టెలిఫోన్ నంబర్లు

పోలీసు కంట్రోల్ రూమ్	100, 2414141
డి.ఐ.జీ. (పోలీసు)	9454400217
కలెక్టర్ (డిష్ట్రిక్టు మాజిష్ట్రేట్)	2502626 / 2502727
రైల్వే ఎంక్వయిరీ - వారణాశి	139, 131
రైల్వే ఎంక్వయిరీ - ముఘల్ సరాయ్	255703, 139
ఆర్.టీ.సీ. ఎంక్వయిరీ	2203476, 2431740
బి.హెచ్.యు. హాస్పిటల్	236950 (అంబు - 230-9307, 7558)
శివప్రసాద్ గుప్తా హాస్పిటల్	2214723 (అంబు - 2214723)
హెరిటేజ్ హాస్పిటల్ (ప్రైవేటు)	2369991 – 95, 2368888

వారణాశి వాతావరణం

మే నెలలో కాశీ లో వేడిగాల్పులు వీస్తుంటాయి (దీనిని ఇక్కడ లూ అంటారు). గాలిలో తేమ ఉండదు అందువల్ల ఉక్కపోత తక్కువ ఉండును.

టెహ్రీ వద్ద గంగమీద ఆనకట్ట కట్టిన దగ్గరనుండి వేసవి కాలంలో గంగలో నీరు బాగా తగ్గిపోతోంది. ఆనకట్ట కట్టని క్రితం వేసవి కాలంలో కూడా గంగా నదిలో నీరు ప్రవహించేది. గత క్రొద్ది సంవత్సరాలగా ప్రవాహంలేక నీరు పరిశుభ్రంగా ఉండటంలేదనే ఫిర్యాదులు వస్తున్నాయి. టెహ్రీ ఆనకట్టనుండి గంగలో ఎల్లప్పుడూ నీరు ఉండేట్టుగా నీటిని వదలాలని చాలా ఆందోళనలు జరుగుతున్నాయి.

గంగా పుష్కరములు - వారణాశి

2011-05-02T22:55:00.000-07:00

గంగా పుష్కరములు - 2011

వారణాశి

పుష్కరములకు విచ్చేయుచున్న యాత్రీకులకు

హార్ధిక శుభాకాంక్షలు

శ్రీ ఖర నామ సంవత్సరంలో వైశాఖ శుక్ల పంచమీ ఆదివారంనాడు (అనగా మే 8, 2011న ఉదయం 3.30 ని.) గురుడు మేష రాశిలో ప్రవేశించడంతో భారతీయులకు పరమ పావనమైన గంగానదికి పుష్కరములు వచ్చుచున్నవి. పన్నెండు రోజులు అనగా వైశాఖ కృష్ణ విదియ (మే 19, 2011) వరకు పుష్కరుడు గంగానదిలో ఉండడం వల్ల గంగా స్నానం మరియు పితృదేవతలకు చేయు తర్పణాదులకు విశేష ఫలితము కలుగును. కాశీలో గంగ ఉత్తర వాహినిగా ప్రవహించడంవల్ల, విశ్వేశ్వరుడు కొలువైనందువల్ల హిందువులు కాశీలో గంగా స్నానము చేయుటకు ఎక్కువ ప్రాధాన్యమిస్తారు. ఈ సంవత్సర కాలము మధ్యాహ్నము 12.00 గం. లకు పుష్కరుడు గంగానదిలో ఉండుట వల్ల ఆ సమయములో చేయు స్నాన, దాన, పితృ కార్యక్రమములకు పుష్కరములలో చేసిన ఫలితమే కలుగును.

కాశీలో వసతి భోజన సౌకర్యములు కలిగిస్తున్న వివిధ సత్రముల వివరములను, పురోహితుల వివరములను కలిగిన ఒక కరపత్రమును ప్రకటించిన కాశీ వచ్చుచున్న యాత్రీకులకు అనువుగానుండు నను ఉద్దేశ్యముతో శ్రీ కాశీ తెలుగు సమితి సభ్యులు ఈ కరపత్రమును ప్రకటించుచున్నారు.

దీనిలోని వివరములు యాత్రీకులకు తమ యాత్రను విజయవంతం గాపూర్తి చేసుకోవడానికి సహకరిస్తాయని మేము ఆశిస్తున్నాము.

ఇట్లు

కార్య వర్గ సభ్యులు

శ్రీ కాశీ తెలుగు సమితి

కాశీ లోని తెలుగు వారి సత్రములు మరియు ఆశ్రమములు

అఖిల భారతీయ బ్రాహ్మణ కరివెన నిత్యాన్నదాన సత్రం, బి. 14/15, మాన సరోవర్	2451953
అన్నపూర్ణ ప్రాంతీయ సేవా ఆశ్రమమము, బి. 6/112 కేదార ఘాట్, సోనార్ పురా	2277868, 6535002
కాశీ అన్నపూర్ణ యాత్రీ భవనము, బి. 14/91, మాన సరోవర్	9839050325
కాశీ ఆర్య వైశ్య వాసవీ నిత్యాన్న సత్రం డి. 47/143 రమాపురా, మిశ్రంబు ఎదురుగా, లక్సారోడ్	2451534
శ్రీ కాశీ వైశ్య సత్ర సంఘం (గుంటూరు వైశ్య సత్రం), బి. 14/15, క్షేమేశ్వర ఘాట్	2452947
శ్రీ మార్కండేయ ఆశ్రమం, బి. 71/192 కేదార ఘాటు	9889707658
శ్రీ నిర్మల శివానంద ఆశ్రమము, బి. 15/35-C పాండే హవేలీ	2450178
శ్రీ రామతారక ఆంధ్రా ఆశ్రమము, బి. 14/92 మానసరోవర్	2450418
శ్రీ శృంగేరి శంకర మఠం, బి. 14/111 కేదార ఘాట్	2452768
శ్రీ తారక రామా నివాస్ (క్షత్రియ సత్రం), బి. 5/281 అవధ్ గర్భి, హనుమాన్ ఘాట్	2277477
శ్రీ వెల్లంపల్లి రాఘవయ్య మరియు రాఘవమ్మ కాశీ నిత్యాన్నదాన సత్రం	2452339

ఇవి కాక తమిళుల, హిందీ వారి సత్రములలో కూడా తెలుగువారికి బస ఇస్తారు. వాటిలో ముఖ్యమయినవి కుమారస్వామి మఠం (తమిళులది), కేదార ఘాట్ వద్ద పాండే ధర్మశాల, లక్సా రోడ్ మరియు హరసుందరీ ధర్మశాల, గదోలియా.

అన్నపూర్ణ మందిరములో ఉదయం 11.00 గం. నుండి సాయింత్రం 3.00 గం. వరకూ అన్నదానము జరుగుతుంది।

మరిన్ని వివరములు రేపటి పోస్టులో

ఉపనిషద్వజ్ఞానము - చివరి భాగము

2011-02-15T23:21:00.000-08:00

పైనక్షత్రమాలలోని మహావాక్యభావము నాకళింపుజేసికొనినవారు, వారికనువగు ఉపనిషత్తును పూర్తి పాఠము, తాత్పర్యమును జదువుకొని ఆత్మానుసంధానమునకు ప్రయత్నింపవచ్చును.

హైందవ సంస్కృతి పునరుద్ధరణకు ఉపయుక్తములగునవి, నిత్య స్వాధ్యాయనమునకు వీలగునవి, కించిత్కాల పారాయణకు సాధ్యమగునవి, ఉపనిషత్తాత్పర్యవచన సారాంశమును ఆస్తికులకు అందుబాటులోనికి తెచ్చు సత్పురుషులు గన్పట్టరైరి.

సగటు మానవాళి ఆసక్తి గల్గిననూ వారి అభిరుచికి తగిన ఉపనిషత్వచన సారాంశము నవగతము చేసికొను సామర్ధ్యము ప్రశ్నార్ధకమే. గనుక నేటి యాంత్రిక యుగమున జిజ్ఞాసులగు ముముక్షులు సమయోచితముగ అనుసంధానమునకు కేవలము 3 మంత్రములనుండి 9 మంత్రముల వరకు గల ఉపనిషత్తులనుటుంకించుట యుక్తముగా భావన.

ఉచితానుచితమును, వారి అర్హతానర్హతలను సద్గురువులద్వారా నెరింగి ఈ క్రింది వానిననుసంధానము జేయనగును.

మూడు మంత్రములు మాత్రమే గల్గి కలిదోషనివారణయు సద్యోముక్తియు గల్గించు 103వదియగు కలిసంతారణోపనిషత్తు గలదని గ్రహించిన పామరుడునూ దీనిని వదలడు. షోడశాక్షరియగు “హరేరామ హరేరామ రామరామ హరేహరే, హరేకృష్ణ హరేకృష్ణ కృష్ణ కృష్ణ హరేహరే” దీనిని నామస్మరణగా భజన గోష్ఠులు చేయుచున్నారు. కాని ఈ రెండు నామములను విడిగా చెప్పుట విచారకరము. మొత్తముగా కలిపి చేయవలయును.
నాలుగు మంత్రములు మాత్రమే గల్గి పాపహరము, మృత్యుంజయమునగునది 71వదగు “సూర్యోపనిషత్”.

కుబేరత్వము, పాండిత్యము గల్గించు “గణపత్యుపనిషత్”

సహస్రగాయత్రి జపఫలితము, దశ సహస్రరుద్రజప ఫలితము నొసగునది 91వదగు “తారసారోపనిషత్”

చతుర్వేదపారాయణ ఫలితమొసగునది 92వదియగు “మహావాక్యోపనిషత్”

సర్వమంత్ర పారాయణ ఫలితమొసగునది 101వదియగు “దత్తాత్రేయోపనిషత్”

జన్మరాహిత్య ప్రదాత్రి 104వదియగు “జాబాల్యోపనిషత్”

5 మంత్రములు మాత్రమే గల్గి నారాయణ సాయుజ్య ప్రదాత్రి 18వదగు “నారాయణోపనిషత్”

శివసాయుజ్య ప్రదాత్రి 28వదగు “కాలాగ్నిరుద్రోపనిషత్”

బ్రహ్మపదమునొసగునది 100దియగు “హయగ్రీవోపనిషత్”

6 మంత్రములు మాత్రమే గల్గి మహాసిద్ధి నొసగునది 81వదగు “శ్రీ దేవ్యుపనిషత్”
7 మంత్రములు గల్గిన మోక్షప్రదాత్రి 49వదగు “దక్షిణామూర్త్యుపనిషత్”
8 మంత్రములు గల విష్ణు సాయుజ్య ప్రదాత్రి 56వదగు “వాసుదేవోపనిషత్”
9 మంత్రములు గల్గి జీవన్ముక్తి, సంసార నివృతతులను గల్గించునవి 50 వదగు “శరభోపనిషత్” మరియు 53వదగు “అద్వయ తారకోపనిషత్”

ఇట్టి ఉపనిషత్తులను తాత్పర్య సహితముగ విడి విడిగా చిన్న పుస్తకములుగ తయారుచేసి ఆస్తిక జన బాహుళ్యమునకు అందించినచో వేదవిజ్ఞానమభివృద్ధినొంది, హైందవ సంస్కృతీ విస్తరణ, పరిరక్షణకు దోహదమగుట తథ్యము.

విజ్ఞులు, నాయీ పరిశ్రమను సదవగాహనతో పరిశీలించి తప్పులున్న యడల మన్నించి, నాకు తెల్పినయడల సర్దుబాటు చేసికొనగలను.

శ్రీ అప్పేశ్వర శాస్త్రిగారు నూటఎనిమిది ఉపనిషత్తుల ను సంగ్రహముగా తెనిగించినట్లు తెలిపినారు। త్వరలోనే వాటిని కూడా ఇక్కడ ప్రకటిస్తాము.

ఉపనిషద్ విజ్ఞానము - 3వ భాగము

2011-02-15T03:21:00.000-08:00

ఈ అష్టోత్తరశత ఉపనిషత్తులు మానవ సముదాయమును ఉద్ధరించుటకు మహర్షులచే నొసంగబడినవి. వీనిలో బహుళ ప్రచారములగు దశోపనిషత్తులు చాతుర్వర్ణములవారికిని, చతురాశ్రమములవారికిని ప్రయోజనకరములు కాగా మహాత్ములు, పండితులు, ప్రవచన కర్తలు వీనిని మాత్రమే ఉపన్యసించుచుండిరి. ప్రత్యేక ప్రయోజనమాశించువారలు, సూక్ష్మములో మోక్షము నాశించువారలు కనీసము తెలిసికొను ఆవశ్యకము గలదు.

వేదాంతవిద్యను బోధించు ఉపనిషత్తులు 24. యోగవిద్యను బోధించునవి 17. వైష్ణవములు 14. శైవములు 15. శాక్త్యములు 8. సన్యాస సాధకములు 17. సిద్ధాన్త సాధనములు 13. ఇవి బ్రహ్మవీద్యా బోధకములు. ఈ 108 ఉపనిషత్తులలో 11 ఋగ్వేదమునుండియు, 19 శుక్ల యజుర్వేదము నుండియు, 31 కృష్ణ యజుర్వేదమునుండియు, 16 సామవేదము నుండియు, 31 అధర్వణ వేదము నుండియు గ్రహింపబడినవి.

ఈ ఉపనిషత్తుల మూలమగు చతుర్వేదముల ద్వారా గ్రహింపబడిన నాల్గు మహావాక్యములు, సర్వసంగపరిత్యాగులై దండకమండల స్వీకారముతో సన్యాసాశ్రమ స్వీకారులకు బ్రహ్మోపదేశముగా ననుగ్రహింపబడును.

1. ప్రజ్ఞానం బ్రహ్మ – లక్షణ వాక్యము

2. తత్త్వమసి – ఉపదేశ వాక్యము

3. అహం బ్రహ్మా௨స్మి – స్వానుభవవాక్యము

4. ఆయమాత్మాబ్రహ్మ – సాక్షాత్కార వాక్యము

వీనితోజేరి ఆత్మాను సంధానమునకు ప్రయత్నించు సర్వులకొరకుగాను మహావాక్య నక్షత్రమాలననుగ్రహించిరి.

	మహావాక్యము	ఉపనిషత్తు
1.	ఈశావాస్యమిదం సర్వం	ఈశావాస్యోపనిషత్
2.	మనస్తత్రలయంయాతి తద్విష్ణోః పరమం పదం	నాదబిందూపనిషత్
3.	ఆత్మావా ఇదమేక ఏవాగ్ర ఆసీత్	ఐతరేయోపనిషత్
4.	సర్వంఖల్విదంబ్రహ్మ	ఛాందోగ్యోపనిషత్
5.	ఏకోదేవస్సర్వభూతేషుగూఢః	కైవల్యోపనిషత్
6.	మనఏవ మనుష్యాణాం కారణం బంధమోక్షయోః	అమృతబిందూపనిషత్
7.	“ఓ” మిత్యేకాక్షరం బ్రహ్మ ఓమిత్యేతేనరేచయేత్	అమృతనాదోపనిషత్
8.	చిత్తఏవహి సంసారం	మైత్రేయణ్యుపనిషత్
9.	యస్మిన్సర్విమిదం ప్రోతం బ్రహ్మస్థావర జంగమం	మంత్రికోపనిషత్
10.	బ్రహ్మైవాహం సర్వవేదాన్త వేద్యం	సర్వసారోపనిషత్
11.	ప్రజ్ఞానం బ్రహ్మ	ఐతరేయోపనిషత్
12.	తత్వమసి	ఛాందోగ్యోపనిషత్
13.	అహం బ్రహ్మా௨స్మి	బృహదారణ్యకోపనిషత్
14.	ఆయమాత్మాబ్రహ్మ	మాండూక్యోపనిషత్
15	ఏకమేవా௨ద్వితీయం సన్నామరూప వివర్జితం	శుకరహస్యోపనిషత్
16	“ఓమి” త్యేకాక్షరం బ్రహ్మ ధ్యేయం సర్వ ముముక్షుభిః	ధ్యానబిందూపనిషత్
17	సో௨హం చిన్మాత్రమేవేతి చింతనం ధ్యానముచ్యతే	త్రిశిఖిబ్రాహ్మణోపనిషత్
18	యావత్‌దృష్ఠిః భృవోర్మధ్యే తావత్కాలం భయం కుతః	యోగచూడామణ్యుపనిషత్
19.	బ్రహ్మైవతేన గంతవ్యం బ్రహ్మకర్మ సమాధినా	శరభోపనిషత్
20.	ఏకమేవా௨ద్వితీయం బ్రహ్మ	పైంగలోపనిషత్
21.	అహం సచ్చిత్పరానంద బ్రహ్మైవా௨స్మి	మహోపనిషత్
22.	సఏష సర్వభూతాన్తరాత్మా	అధ్యోత్మోపనిషత్
23	త్యాగేనైకే అమృతత్వమానసుః	అవధూతోపనిషత్
24.	బ్రహ్మవిదాప్నోతిపరం	భస్మజాబోలోపనిషత్
25.	హరేరామ హరేరామ రామరామ హరేహరే హరేకృష్ణ హరేకృష్ణ కృష్ణ కృష్ణ హరేహరే	కలిసంతారణోపనిషత్
26.	అస్తిభాతి ప్రియం రూపం నామచేత్సంశ పంచకం	సరస్వతీ రహస్యోపనిషత్
27.	అశబ్ద మస్పర్శ మరూపమవ్యయం తథా௨రసం నిత్యమగంధవచ్చయత్	ముక్తికోపనిషత్

ఉపనిషద్ విజ్ఞానము - 180ఉపనిషత్తుల పేర్లు

2011-02-14T03:03:00.000-08:00

	ఉపనిషత్తు పేరు	వేదమూలము
1	ఈశావాస్యోపనిషత్	శుక్లయజుర్వేదము
2	కేనోపనిషత్	సామవేదము
3	కఠోపనిషత్	కృష్ణయజుర్వేదము
4	ప్రశ్నోపనిషత్	అధర్వణవేదము
5	ముండకోపనిషత్	అధర్వణవేదము
6	మాండూక్యోపనిషత్	అధర్వణవేదము
7	తైత్తరీయోపనిషత్	కృష్ణయజుర్వేదము
8	ఐతరేయోపనిషత్	ఋగ్వేదము
9	ఛాందోగ్యోపనిషత్	సామవేదము
10	బృహదారణ్యకోపనిషత్	శుక్లయజుర్వేదము
11	బ్రహ్మోపనిషత్	కృష్ణయజుర్వేదము
12	కైవల్యోపనిషత్	కృష్ణయజుర్వేదము
13	జాబోలోపనిషత్	సామవేదము
14	స్వేతాశ్వతరోపనిషత్	కృష్ణయజుర్వేదము
15	హంసోపనిషత్	శుక్లయజుర్వేదము
16	ఆరుణికోపనిషత్	సామవేదము
17	గర్భోపనిషత్	కృష్ణయజుర్వేదము
18	నారాయణోపనిషత్	కృష్ణయజుర్వేదము
19	పరమహంసోపనిషత్	శుక్లయజుర్వేదము
20	అమృతబిందూపనిషత్	కృష్ణయజుర్వేదము
21	అమృతనాదోపనిషత్	కృష్ణయజుర్వేదము
22	అధర్వశిరోపనిషత్	అధర్వవేదము
23	అధర్వశిఖోపనిషత్	అధర్వవేదము
24	మైత్రాయణ్యుపనిషత్	సామవేదము
25	కౌషీతకీ బ్రాహ్మణోపనిషత్	ఋగ్వేదము
26	బృహజ్జాబోలోపనిషత్	అధర్వవేదము
27 అ	నృసింహపుర్వతాపిన్యుపనిషత్	అధర్వవేదము
27 ఆ	నృసిహఉత్తర తాపిన్యుపనిషత్	అధర్వవేదము
28	కాలాగ్నిరుద్రోపనిషత్	కృష్ణయజుర్వేదము
29	మైత్రేయోపనిషత్	సామవేదము
30	సుబాలోపనిషత్	శుక్లయజుర్వేదము
31	క్షురికోపనిషత్	కృష్ణయజుర్వేదము
32	మంత్రికోపనిషత్	శుక్లయజుర్వేదము
33	సర్వసారోపనిషత్	కృష్ణయజుర్వేదము
34	నిరాలంబోపనిషత్	శుక్లయజుర్వేదము
35	శుకరహస్యోపనిషత్	కృష్ణయజుర్వేదము
36	వజ్రసూచికోపనిషత్	సామవేదము
37	తేజోబిందూపనిషత్	కృష్ణయజుర్వేదము
38	నాదబిందూపనిషత్	ఋగ్వేదము
39	ధ్యానబిందూపనిషత్	కృష్ణయజుర్వేదము
40	బ్రహ్మ విద్యోపనిషత్	కృష్ణయజుర్వేదము
41	యోగతత్వోపనిషత్	కృష్ణయజుర్వేదము
42	ఆత్మబోధోపనిషత్	ఋగ్వేదము
43	నారదపరివ్రాజకోపనిషత్	అధర్వవేదము
44	త్రిశిఖిబ్రాహ్మణోపనిషత్	శుక్లయజుర్వేదము
45	సీతోపనిషత్	అధర్వవేదము
46	యోగచూడామణ్యుపనిషత్	సామవేదము
47	నిర్వాణోపనిషత్	ఋగ్వేదము
48	మండలబ్రాహ్మణోపనిషత్	శుక్లయజుర్వేదము
49	దక్షిణాముర్త్యుపనిషత్	కృష్ణయజుర్వేదము
50	శరభోపనిషత్	అధర్వవేదము
51	స్కంధోపనిషత్	కృష్ణయజుర్వేదము
52	మహానారాయణోపనిషత్	అధర్వవేదము
53	అద్యయతారకోపనిషత్	శుక్లయజుర్వేదము
54	రామరహస్యోపనిషత్	అధర్వవేదము
55 అ	రామపూర్వతాపిన్యుపనిషత్	అధర్వవేదము
55 ఆ	రామఉత్తరతాపిన్యుపనిషత్	అధర్వవేదము
56	వాసుదేవోపనిషత్	సామవేదము
57	ముద్గలోపనిషత్	ఋగ్వేదము
58	శాండిల్యోపనిషత్	అధర్వవేదము
59	పైంగలోపనిషత్	శుక్లయజుర్వేదము
60	బిక్షుకోపనిషత్	శుక్లయజుర్వేదము
61	మహోపనిషత్	సామవేదము
62	శారీరకోపనిషత్	కృష్ణయజుర్వేదము
63	యోగశిఖోపనిషత్	కృష్ణయజుర్వేదము
64	తురీయాతీతోపనిషత్	శుక్లయజుర్వేదము
65	సన్యాసోపనిషత్	సామవేదము
66	పరమహంసపరివ్యాజకోపనిషత్	అధర్వవేదము
67	అక్షమాలికోపనిషత్	ఋగ్వేదము
68	అవ్యక్తోపనిషత్	సామవేదము
69	ఏకాక్షరోపనిషత్	కృష్ణయజుర్వేదము
70	అన్నపూర్ణోపనిషత్	అధర్వవేదము
71	సూర్యోపనిషత్	అధర్వవేదము
72	అక్ష్యుపనిషత్	కృష్ణయజుర్వేదము
73	అధ్యోత్మోపనిషత్	శుక్లయజుర్వేదము
74	కుండికోపనిషత్	సామవేదము
75	సావిత్ర్యుపనిషత్	సామవేదము
76	ఆత్మోపనిషత్	అధర్వవేదము
77	పాశుపతబ్రహ్మోపనిషత్	అధర్వవేదము
78	పరబ్రహ్మోపనిషత్	అధర్వవేదము
79	అవధూతోపనిషత్	కృష్ణయజుర్వేదము
80	త్రిపురతాపిన్యుపనిషత్	అధర్వవేదము
81	దేవ్యుపనిషత్	అధర్వవేదము
82	త్రిపురోపనిషత్	ఋగ్వేదము
83	కఠరుద్రోపనిషత్	కృష్ణయజుర్వేదము
84	భావనోపనిషత్	అధర్వవేదము
85	రుద్రహృదయోపనిషత్	కృష్ణయజుర్వేదము
86	యోగకుండలిన్యుపనిషత్	కృష్ణయజుర్వేదము
87	భస్మజాబాలోపనిషత్	అధర్వవేదము
88	రుద్రాక్షజాబాలోపనిషత్	సామవేదము
89	గణపత్యుపనిషత్	అధర్వవేదము
90	దర్శనోపనిషత్	సామవేదము
91	తారసారోపనిషత్	శుక్లయజుర్వేదము
92	మహావాక్యోపనిషత్	అధర్వవేదము
93	పంచబ్రహ్మోపనిషత్	కృష్ణయజుర్వేదము
94	ప్రాణాగ్నిహోత్రోపనిషత్	కృష్ణయజుర్వేదము
95	గోపాలతాపిన్యుపనిషత్	అధర్వవేదము
96	కృష్ణోపనిషత్	అధర్వవేదము
97	యాజ్ఞ్యావల్క్యోపనిషత్	శుక్లయజుర్వేదము
98	వరాహోపనిషత్	కృష్ణయజుర్వేదము
99	శాట్యాయనోపనిషత్	శుక్లయజుర్వేదము
100	హయగ్రీవోపనిషత్	అధర్వవేదము
101	దత్తాత్రేయోపనిషత్	అధర్వవేదము
102	గారుడోపనిషత్	అధర్వవేదము
103	కలిసంతారణోపనిషత్	కృష్ణయజుర్వేదము
104	జాబాల్యుపనిషత్	సామవేదము
105	సౌభాగ్యలక్ష్మ్యుపనిషత్	ఋగ్వేదము
106	సారస్వతీరహస్యోపనిషత్	ఋగ్వేదము
107	బహ్వృచోపనిషత్	ఋగ్వేదము
108	ముక్తికోపనిషత్	శుక్లయజుర్వేదము

ఉపనిషద్విజ్ఞానము

2011-02-12T01:17:00.000-08:00

ఉపనిషద్విజ్ఞానము

దీనిని చాలా రోజుల క్రితం బ్రహ్మశ్రీ జానపాటి బాల నరస అప్పేశ్వరశాస్త్రిగారు నాకు ఇచ్చారు। ఇందులో ఉపనిషత్తుల పేర్లు వాటి విశేషాలు ఉన్నాయి। పాఠకులకు నచ్చుతుంది, జ్ఞానవర్ధకం గా ఉంటుందన్న ఉద్దేశ్యంతో దీనిని ఇక్కడ ప్రకటిస్తున్నాను। ఇంతకు ముందు కాశీకేదారాన్ని ఆదరించినట్లే దీనినీ ఆదరింస్తారని తలుస్తూ

మీ
వేణుగోపాల్

వర్ధతాం బ్రహ్మవిద్యాచ లోకేభ్యః సుఖమేధతామ్

మానవజాతి యొక్క సంస్కృతిని పెంచునది సంస్కృత భాష. గనుక లోకమున వేద విజ్ఞానము బ్రహ్మవిద్య ద్వారానే వర్ధిల్ల వలసియున్నది.

కృతయుగ, త్రేతాయుగ, ద్వాపరయుగముల వరకును మహర్షుల ద్వారా వారి శిష్య ప్రశిష్యులకు బోధింపబడిన వేద విజ్ఞానము క్రమ క్రమముగ లోపించుచు కలియుగమున పండిత ప్రకాండులకు మాత్రమే పరిమితమయినది.

జాతస్యహి ధృవోమృత్యుః. ఈ జనన మరణ పరిభ్రమణమునుండి తప్పించుకొను మార్గము జన్మరాహిత్యమార్గాన్వేషణ. దానినే ముక్తి, మోక్షము, కైవల్యము అందురు. జ్ఞానాదేవీతుకైవల్యమ్. కైవల్యప్రాప్తి జ్ఞానము ద్వారానే సాధ్యము. మరిజ్ఞానసముపార్జనకు ఒకేమార్గము వేద, వేదాంగ, వేదాంత, శ్రవణ, పఠన, మనన, నిదిధ్యాసము. వేదములపౌరుషేయములై గురుశిష్య పరంపరగా ఉపవీతులై గురూపదేశమున మాత్రమే సాధ్యము. ఇతర మత, కుల, లింగభేదములవారు నినుట కూడ నిషిద్ధమను సనాతన వేదవిదుల తర్క వాదము గూడ గలదు. కాని సామాన్య మానవులు జ్ఞానసముపార్జనకనర్హులనుట దుస్సాహసము.

మంత్ర పఠన, శ్రవణార్హత లేకపోవచ్చును గాని తత్తాత్పర్యమునవగతము జేసికొని, నిష్ఠాగరిష్ఠులై, మనన, నిదిధ్యాసమూలమున జ్ఞనము బడయనగును. కాని ఉపనిషత్తులను వినినంతనే అవి అగ్రాహ్యములుగానెంచి సామాన్య మానవులు భక్తి, నీతి, ధర్మ ప్రబోధకములగు రామాయణ, భారత, భాగవత ప్రబంధములు, పురాణేతిహాసములకు పరిమితమగుట నిత్య సత్యము. ఇవి పుణ్య ప్రదములై మానవ నిత్య జీవిత మార్గదర్శకములు.

జ్ఞాన, వైరాగ్య ప్రబోధకములగు ఉపనిషత్తులను గుఱించియు, వాని తాత్పర్య సూచితము నవలోకించుట తెలివిగల ప్రతి మానవునకావశ్యకము.

బ్రహ్మకు గోచరించిన చతుర్వేదముల సారమంతయును, ఉపనిషత్తుల రూపమున మహర్షులకు వేదాంగములుగ భాసించినవి. నాల్గువేదముల నుండి మొత్తము 1180 ఉపనిషత్తులు వెల్వడగా అందు ఋగ్వేదీయములు 21, యజుర్వేదీయములు 109, సామవేదీయములు 1000, అధర్వణములు 50. వీనినుండి ముఖ్యమగు 108 ఉపనిషత్తులను మాత్రము శ్రీరామచంద్రులచే శ్రీమదాంజనేయస్వామికి ఉపదేశింపబడినట్లు 108వదగు ముక్తికోపనిషత్తు ప్రమాణము. శ్రీరామ పట్టాభిషేక సమయమున సీతామాతచే బహూకరింపబడిన మౌక్తిక మాలను శ్రీమదాంజనేయ స్వామి భిన్నము చేయగా శ్రీరామచంద్రులు 1180 ఉపనిషత్తుల మూలమంత్రములను మాలగా అలంకరింపజేసి శ్రీమదాంజనేయుని తృప్తిపరచినట్లును పురాణగాథ గలదు.

ఆర్షధర్మము - మొదటి భాగము

2009-06-21T01:09:00.000-07:00

1. నిద్ర మేల్కొనుట
“బ్రహ్మీ ముహూర్తే ఉత్థాయ”, “బ్రహ్మీముహూర్తే యానిద్రా సాపుణ్య” అంటుంది ధర్మశాస్త్రం. బ్రహ్మ మూహూర్తం అనగా ఉదయం సూర్యోదయం అక్షాంశ రేఖను బట్టి ఏ ప్రదేశములో ఎన్ని గంటలకు జరుగుతుందో ఖచ్చితంగా తెలిసికొని దానికి ఒక మూహూర్తం అనగా రెండు ఘడియల కాలం అనగా 48 నిమిషముల ముందు కాలం ఆసురీ ముహూర్తం, దానికి 48 నిమిషములు ముందు కాలం బ్రహ్మ ముహూర్తం. ఆ సమయములో భగవచ్చింతన జేయువారిని దేవతలు ప్రీతిగా ఆశీర్వదిస్తారని, మానవ మేథస్సునకు బ్రహ్మ సంకేతములు అందు కాలము ఆ ముహూర్తమనియు, ఆ సమయమున నిద్రించువారి పూర్వ జన్మల మరియు ఈ జన్మన ఆర్జించిన పుణ్యము కూడ క్షయమగుననియు వేద ప్రమాణము. బ్రహ్మ మూహూర్తమున ధ్యానం సత్ఫల దాయకము.

2. నిద్రనుండి మేల్కొని కనులు తెరుస్తూనే తమ అరచేతులను చూచుకొనుచు “కరాగ్రే వసతే లక్ష్మి, కరమధ్యే సరస్వతి, కరమూలేతు గౌరీం తాం ప్రభాతే కర దర్శనం” అనే శ్లోకాన్ని మననం చేసికొని ముగ్గురు దేవేరిలను కుడి అరచేతిలో ఆవాహన జేసికొని కనులకద్దకొనవలెను. దీనివలన, మానవ సహజముగా కష్టం కలిగినపుడు ఈ రోజు లేస్తూనే ఎవరి ముఖం చూచామో యిలాజరిగినదని పరనింద జేసి పాపం మూటగట్టుకొనుట నివారింప వచ్చును.

3. భూమాత, భూదేవియని, భూమిని పంచ భూతములలోనొకటిగా ఆరాధించుట హైందవ సంస్కృతి. గనుక ప్రతి దినం “సముద్ర వసనే దేవి పర్వతస్థనమండలే, విష్ణుపత్ని నమస్తుభ్యం, పాద స్వర్శం క్షమస్వమే” యను శ్లోకాన్ని మననం చేసుకొని భూమికి నమస్కరించిన తర్వాత పాదాలు భూమిపై మోపాలి. ప్రతి యుగాంతం తర్వాత జలప్రళయం నుండి మరల భూమి ఉద్భవించి, దానిపై జీవరాసులు సృష్టింపబడి, ఆ భూమి నుండి వచ్చే ఆహారం ద్వారానే జీవులు బ్రతుకుచున్నప్పుడు, అలాంటి భూమిపై నడుస్తూ, ఉమ్ముతూ, మలమూత్ర విసర్జన చేస్తున్నాము. భూమాత కోపిస్తే భూకంపము, క్షామము ద్వారా వినాశము తథ్యము కనుక మన అపరాధములను క్షమింపవేడి నమస్కరించి భూమిపై కాళ్ళు పెట్ట వలెను.

4. పండ్లు తోముట, మలమూత్ర విసర్జన :
సూర్య చంద్ర గమనదిశలగు తూర్పు, పజమరలకు ఎదురుగా చేయరాదు. దంతధావనము ద్వారా, నోటిలో నురగలోనుండు సూక్ష్మ క్రిములు వేరుచోట్ల ప్రబలకుండునట్లు అటునిటు తిరుగకుండ ఒకేచోట చేయుట ఆరోగ్యదాయకము. మూత్ర విసర్జన నిలుచొని చేసినందున కొన్ని సమయములలో తల తిరుగుట, స్పృహతప్పుట ప్రత్యక్ష ప్రమాణములుగా తెలియుచున్నవి. అతి త్వరగా మూత్ర విసర్జన చేయవలసివచ్చినపుడు, కనులు మూసుకొని కూర్చొని చేయుట క్షేమమని డాక్టర్లు కూడ నిర్ధారించిరి.

5. స్నానము : చన్నీటి స్నానము ఉత్తమము. మొదట తలపైనుండి ఆరంభిచవలెను. క్రొత్తగా చన్నీటి స్నానం చేయుట వలన జలుబు చేయు ప్రమాదం కలదు కాని విడువకుండ అలవాటు చేసికొనినయడల ప్రశాంతత, మనోనిగ్రహం, ఏకాగ్రత, కంటికీ, మెదడుకు చలువజేసి కోపతాపాలనుండి ఉపశమనము పెద్దల అనుభవము. అట్టి ముఖ్యోద్దేశముతో హైందవ సంస్కృతి కార్తీక, మాఘస్నానాలని, దీక్షల పేరుతో మండలము రోజులు అనగా 48 రోజులు మూడువేళలా చన్నీటి తలస్నానం ఆదేశించిరి.

వేడినీటితో చేయునపుడు ముందుగా కాళ్లు తడుపుకొని ఆ తరువాత శరీరం తడుపకోవలెను.

శ్లో ॥ గంగే చ యమునే చైవ గోదావరి సరస్వతి
నర్మదా, సింధు, కావేరి జలే ऽ స్మిన్ సన్నిధిం కురు ॥

శ్లో ॥ గంగా గంగేతి యో బ్రూయంత్ యోజనానే శతైరపి
ముచ్యతే సర్వపాపే భ్యో విష్ణులోకం సగచ్ఛతి ॥

పవిత్ర నదులను స్మరించి మనము స్నానము చేయు నీటియందు ఆవాహన చేయుట వలన, గంగా గంగా యనుచు పుణ్య గంగానదీ స్నానానుభూతి పొందుట ద్వారా మానవులు పాప రహితులై విష్ణులోకమును బొందుదురని ధర్మశాస్త్రము.

స్నానం చేయునపుడు పురుషులు దిగంబరముగా మొలపై వస్త్రము లేకుండగను, స్త్రీలు వెంట్రుకలు విరియబోసుకొని నిలుచుండియూ స్నానము చేయరాదు. ఆ సమయమున భూత, ప్రేత, పిశాచములు ఆవహించు ప్రమాదము గలదు.

ప్రాతఃకాల స్నాన సమయము
తెల్లవారు ఝామున గం. 4 – 5 మధ్య ఋషి స్నానము. మహర్షులాసమయమున స్నానం చేయుదురనుటకు నిదర్శనం రామాయణమున అహల్యా శాప వృత్తాంతము.
గం. 5 – 6 మధ్య దైవ స్నానం. దేవాలయములలో దేవతా విగ్రహములకు ఆ సమయమున అభిషేకము నిర్వహింతురు.
గం. 6 – 7 మధ్య మానవ స్నానం. మానవులు కనీసం ఈ సమయంలోనయినా స్నానం చేయగలిగితే, స్నానానంతరం సూర్యునకు నమస్కారం చేసి ఆరోగ్యముగా నుండుటకు వీలగును. బ్రహ్మమూహూర్తంముందుగనే స్నానం చేసి కూర్యోదయం వరకు జప, తపాది అనుష్ఠానములు చేయువారు నిష్ఠాగరిష్ఠులగు, సనాతన సదాచార సంపన్నులగుదురు.
గం. 7 తరువాత రాక్షస స్నానం. నింద్యము.
స్నానం తరువాత ముందుగా ముఖము, తరువాత వక్షస్థలము, తరువాత శిరస్సు, ఆపై మిగిలిన అంగములు తుడుచుకొనవలెను. ఇట్లు చేయుట వైద్య శాస్త్రం ద్వారా సైనస్, నిమోనియా, జలుబు రాకుండగా కాపాడు కొనుటయే.

మానవ నిత్యాచరణ ధర్మములన్నియూ ఋషి ప్రోక్తములగు సాధారణ, శరీర వైద్య శాస్త్రమే.

పురుషులకు అభ్యంగన స్నానవారదోషములు:
ఆదివారం - తాపము. నివారణకు నూనెలో పుష్పములు.
సోమవారం - కాంతి, మనోల్లాసము.
మంగళవారం - మృతి. నివారణకు నూనెలో మన్ను.
బుధవారం - లక్ష్మీ కటాక్షము.
గురువారం - ధన నాశం. నివారణకు నూనెలో గరిక.
శుక్రవారం - విపత్తు. నివారణకు నూనెలో గోమయం.
శనివారం - భోగము

గమనిక : పండుగ, శుభదినములకు ఈ దోషము వర్తించదు.

స్త్రీలకు మంగళ, గురు, శుక్రవారములు శుభములు.

సముద్ర స్నానము: ముందుగా మంచినీటి స్నానం చేసి వెళ్ళి సముద్ర స్నానము చేసి వచ్చిన వెంటనే మరల మంచినీటి స్నానం చేయవలయును. ఒకే సంవత్సరములో క్రమంగా ఆషాఢ, కార్తీక, మాఘ, వైశాఖ పూర్ణిమ దినములు సముద్రస్నానం మోక్షప్రదమగు వ్రతము. సముద్ర స్నానము ఒక ఘడియ (24 నిముషముల) కు పైగా చేసిన యడల మగవారిలో పుంసత్వము, ఆడవారిలో గర్భధారణ శక్తి తగ్గునని లోకోక్తి.

6. వస్త్ర ధారణ
స్నానానంతరం ఉతికి ఆరవేసిన పొడి వస్త్రములు ధరించి మూఖాలంకరణ చేసికొని దైవ ప్రార్థన చేయవలయును. తడి బట్టలతో శుభకార్యములు దైవ కార్యములు చేయరాదు. సంప్రదాయదుస్తులు ధరించి, అధునాతన అనుకరణలు విసర్జించుట సనాతన ధర్మము. సంప్రదాయ వస్త్రధారణ వలన తమ మనస్సు పవిత్రమై, ఇతరులను ఆకర్షించు పాపము నుండి విముక్తులగుదురు.

7. ముఖాలంకరణ
భస్మధారణ: హిందువులందరునూ విధిగా భస్మ ధారణ చేయవలయునని శివపురాణము వక్కాణించినది. పురుషులు మాత్రమేగాక స్త్రీలును త్రిపుండ్ర ధారణ చేయుట తమిళ సాంప్రదాయము.

శ్లో॥ శ్రీకరం చ పవిత్రం చ శోకరోగ నివారణం
లోకే వశీకరం పుంసాం భస్మం త్రైలోక్య పావనమ్॥
శ్లో॥ వినాభస్మ త్రిపుండ్రేన, వినా రుద్రాక్షమాలయా
పూజితో పి మహాదేవి నస్యాత్ తస్య ఫలం లభేత్॥
శ్లో॥ తత్సర్వం ఫలితం నాస్తి లలాటే తిలకం వినా
లలాటే సతతం దేవ్యాశ్రయ సహవిరాజితం
చతుశ్చక్రం నమస్యామి కేశవం కనకప్రభం॥
శ్లో॥ స్నానం, దానం, జపో, హోమం, సంధ్యా స్వాధ్యాయ కర్మసు
ఊర్ధ్వపుండ్ర విహీనశ్చ తత్సర్వం నిష్పలం భవేత్॥
శ్లో॥ శ్రాద్ధే, యజ్ఞే, జపో, హోమే, వైశ్వదేవే, సురార్చనే
ధృత త్రిపుండ్ర పూతాత్మా మృత్యుంజయతి మానవః॥

భస్మధారణ లేని ముఖమును, శివాలయము లేని గ్రామమును, శివార్చన లేని గృహమును, ఛీ, ఛీ, యనమని శివపురాణము. తాత్పర్యమేమనగా, హిందువులందరు తమ మతానుసారము విభూది, తిలకము, త్రిచూర్ణము, చందనము, మరేదయినను నుదుట ధరించి, ఆజ్ఞా చక్ర స్థానమగు భృకుటియందు పసుపుతో తయారు చేసిన కుంకుమ ధరించి, మెడలో రుద్రాక్ష మాలగాని, మరే మాలనయిననూ ధరించి దైవ ప్రార్ధన చేయుట వలన, పవిత్రతయే గాక దృష్టి దోష నివారణ కూడ జరుగును. శ్రీకృష్ణ పరమాత్మ, శ్రీరామచంద్రుడు ఒంటినిండా విభూది పూసుకొని త్రిపుండ్రములు ధరించి, పాశుపత దీక్షతో పంచాక్షరి జపించినట్లు పురాణముల గాధలు. నేటి కాలపు ముఖాలంకరణగా రంగుల రేఖలు, రంగుల బిళ్లలు ధరించుట ఆత్మహత్యా సదృశము. దేవతా విగ్రహములకు, పటములకు, మగవారు కూడ స్టిక్కర్లు ధరించుట విచారకరము.

8. మాలాధారణ
వక్షస్థలమున ధరించుటకును, జపమునకు బొటనవ్రేలు, మధ్యవ్రేలు, అనామికలతో మాలలోని పూసలను ముందుకు జరుపుటకును, వివిధ మాలలలో తంత్రసార శాస్త్రానుసారము తులసిమాల, శంఖమాల, పవడముల మాల, స్ఫటిక మాల, ముత్యాలమాల, పద్మాక్షమాల, సువర్ణమాల, కుశగ్రంధి మాలలు ఒకదానికన్న ఒకటి వరుసగా పది పది రెట్లు అధికఫలమొసంగును. ఇక రుద్రాక్షమాల అనంత ఫలదాయకము.

రుద్రాక్షమాలలము గురించి ప్రస్తుత కాలమున వారపత్రికలు, దృశ్యమాధ్యమముల (T.V.) ద్వారా వాణిజ్యప్రచారము ఎక్కువగా జరుగుచున్నది. కాని రుద్రాక్షలలో ఏకముఖి నుండి 14 ముఖములవరకు గలవాని విశిష్ఠత ప్రత్యేక మంత్ర బలము వలన సిద్ధించునేకాని, కేవలము ధరించినంత మాత్రమున సిద్ధించదని వేదవాక్యము.

9. ఆసనము
శ్రీకృష్ణ పరమాత్మ భగవద్గీత 6వ అధ్యాయం 11వ శ్లోకంలో ధ్యానము, పూజలకు
శ్లో॥ శుచౌదేశే ప్రతిష్ఠాప్య స్థిరమానసమాత్మనః
నాత్యుచ్ఛితం నాతినీచం చేలాజిన కుశోత్తరమ్॥
అంటారు. మనసు భగవంతుని ఆరాధనలో లగ్నమగుటకు ఆసన ప్రభావం కూడ దోహదకారి. ఈ నాటి పరిస్థితులను బట్టి జింక చర్మంగాని, పులి చర్మంగాని లభించకపోయినా, సరాసరి నేలపై కూర్చొనకుండ పీటవేసికొని దానిపై దర్భాసనం, దానిపై చిత్రాసనం దొరకని యడల మెత్తని తెల్లని వస్త్రం వేసికొని కూర్చొనవలెను.
దర్భాసనం - పుష్ఠిని, కంబళి - దుఃఖవిమోజనమును, చిత్రాసనం - కామ్యసిద్ధిని, జింకచర్మం - జ్ఞానమును, పులిచర్మం - మోక్షమును, తెల్లని వస్త్రం - శాంతిని గల్గించును.
వెదురు - దరిద్రం, రాయి - వ్యాధి, నేల – దుఃఖము, కొయ్య – దౌర్భాగ్యము, గడ్డి - యశోహాని, చిగురుటాకులు - చిత్రభ్రమణము గాన వీనిని ఉపయోగింపరాదు.

10. ఇష్టదేవతా ప్రార్థన
84 లక్షల జీవరాసులను సృష్ఠించిన బ్రహ్మదేవునకు తనను తెలుసుకొను జీవిలేదను విచారముతో మానవులకు బుద్ధియను ప్రత్యేక గుణమును ప్రసాదించి జీవిత పరమావధిని తెలిసికొనునట్లు సృష్ఠించెను. కనుక ప్రతి మానవునకు ఇష్టదేవతా ప్రార్ధన ముఖ్యము. కోరికలతోనో, లేక కష్టములనుండి విముక్తి కొఱకో, లేక తప్పులకు క్షమాపణగానో గాక, మానవ జన్మనిచ్చినందులకు కృతజ్ఞతగా జన్మరాహిత్యము కొరకు నిత్యమూ ఇష్టదేవతా ప్రార్థన చేయుట విద్యుక్త ధర్మము. శుచిగా తూర్పుముఖముగా కూర్చొని దైవప్రార్థన చేయవలెను.

ఆర్షధర్మము --- విన్నపము

2009-06-06T23:51:00.000-07:00

విన్నపము

పూర్వజన్మల పుణ్య ఫలముగా భగవద్దత్తమయిన మానవజన్మను సఫలంచేసికొని, పతనం కాకుండా భక్తి, జ్ఞాన వైరాగ్యములను పొంది, పరమాత్మ కృపకు పాత్రులమగుటకు సనాతన ఆర్ష ధర్మానువర్తనమే పరమావధి. “ధర్మో రక్షతి రక్షితః" ధర్మ బద్ధులమయి జీవించి ధర్మముచే నుద్ధరింపబడవలసి యున్నది.

వేదాంతపరంగా మానవుడు త్రిదోషాలను ప్రయత్నపూర్వకముగా నిర్మూలించుకొని భగవత్కృపాపాత్రులు గావలసియున్నది. అవి మల, విక్షేపణ, ఆవరణ దోషాలు. మలదోషం శౌచం ద్వారాను, విక్షేపదోషం సద్గ్రంథ పఠన, శ్రవణముల ద్వారాను, ఆవరణ దోషం జప, తపాద్యనుష్ఠానముల ద్వారా నిర్మూలనమగునని శాస్త్ర ప్రమాణముగాన మొదటి మెట్టు శౌచము. నవసమాజములో మానవులు శరీర బాహ్య శౌచము ద్వారా ప్రజలను ఆకట్టుకొనగల్గుచున్నారు గాని, అంతః శౌచం తెలియక, పాటించలేనందు వలన భగవత్కృపకు పాత్రులుగాలేక పోవుచున్నారు.

గురు, బుధ, పండిత, ఆచార్యవర్యులు, ధర్మ ప్రచారముకన్న భక్తి ప్రచారమునకు ఎక్కువ ప్రాధాన్యతనిస్తున్నారు. మనోనైర్మల్యం లేని భక్తితో ఏకాగ్రత సాధించలేమనునది సత్యము. భారతీయ మానవులలో నరనరములందు రక్తంలోనే భక్తి ఇమిడియుంటుంది. కాని ధర్మాచరణ లేని భక్తి ఫలితం అత్యల్పము. జన్మాంతర సుకృతం వలన చరాచర జీవరాశిలో నాల్గవది, ఉత్తమమగు మానవ జన్మను, సనాతన ఆర్షధర్మ ఆచరణద్వారా సార్ధకం చేసికొనాలి.

మానవలక్షణాలున్నంతమాత్రాన మానవులముగాము. అజ్ఞాన, జ్ఞాన, విజ్ఞాన, సుజ్ఞానముల తారతమ్యములు తెలిసికొని సద్ధర్మాచరణ గావించాలి. వేద, శాస్త్ర, ఇతిహాస, పురాణములన్నియూ మానవ అభ్యుదయానికీ, భక్తి, జ్ఞాన, వైరాగ్య సాధనకూ మూలము స్వధర్మాచరణయేనని ప్రబోధిస్తున్నవి.

కనీసము మన నిత్యకృత్యములలో ఆచరించగల్గిన ధర్మాలను తెలిసికొని ఇంతవరకు తెలియక చేసిన తప్పులను సరిదిద్దుకొని మానవార్హతబొంది సద్గతిని బొందపలసియున్నది. ఉట్టికెక్కలేనమ్మ స్వర్గానికి పాకులాడినట్లు, ఇంట గెలవకయే రచ్చ గెలవాలనే తాపత్రయంలా, ధర్మాచరణలేని మానవుల పూజలూ, పుస్కారములు, పురాణ భాష్య శ్రవణములు, తీర్థయాత్రలు, సత్సంగములు అత్యల్ప ఫలదాయకము మాత్రమే.

మానవునకసాధ్యములేదు. మనసుంటే మార్గంముంటుంది. మాట్లాడే ప్రతిమాట భావాన్ని మనసుకు పట్టించుకుంటే చాలు. “భవానీ భావనాగమ్యా" మనం రోజూ నిద్రలేచినది మొదలు మరల పరుండేవరకు ఆచరించగలిగే కొన్ని ధర్మాలను తెలిసికొనవలయునను కుతూహలంతో, నా అల్ప పరిజ్ఞానానికందినంత సేకరించి తోటివారికందించి ఉడుతాభక్తిగా మానవసేవ రూపంలో మాధవసేవకు ప్రయత్నించాను.

ప్రయత్నం నాది, ఫలితం చదువరులది.

బుధజన విధేయుడు
బాలనరస అప్పేశ్వర శాస్త్రి
కాశీవాసి